Advertise your products Here Better Faster

Handball: APR yegukanye Irushanwa ryo Kwibuka yihereranye Police HC

By Ndabateze Jean Bosco

APR HC yegukanye Irushanwa Mpuzamahanga ryo Kwibuka Jenoside yakorewe Abatutsi mu 1994 itsinze mukeba wayo Police HC ibitego 24-22.

Imikino ya nyuma y’iri rushanwa ryabaye iminsi itatu, yabereye ku kibuga cya Kimisagara ku Cyumweru, tariki ya 2 Kamena 2024.

Iri rushanwa ryakinwe mu bagabo n’abagore, hitabira amakipe yo mu Rwanda na Uganda.

Abegukanye imidari mu irushanwa

Mu bagore hitabiriye amakipe atanu yahuye hagati yayo, igikombe cyegukanwa na Three Stars yatsinze imikino ine.

Ikipe ya Prisons yo muri Uganda yabaye iya kabiri ni mu gihe iya gatatu yabaye University of Kigali.

Mu bagabo, umukino wa nyuma wahuje APR HC na Police HC zo mu Rwanda, Ikipe y’Ingabo z’Igihugu yegukana igikombe itsinze ibitego 24-22.

Ni umukino utari woroshye kuko APR yawinjiyemo ifite gahunda yo kwihorera nyuma y’uko Police yari yayitsinze mu mukino waherukaga guhuza amakipe yombi muri Shampiyona.

APR yatangiye neza umukino itsinda, ubona Police itarinjira mu mukino neza aho ku munota 18 byari ibitego 10-4.

Police HC yagarutse mu mukino ndetse igabanya ikinyuranyo, amakipe yombi ajya kuruhuka ari ibitego 16 bya APR kuri 13 bya Police.

Mu gice cya kabiri, Ikipe y’Abashinzwe umutekano yiminjiriyemo agafu, icurika ikibuga ndetse ubwo bari bageze ku munota wa 17 yari yamaze kujya imbere ya APR ifite ibitego 20-17.

Byari ishiraniro mu kibuga ku makipe yombi

Mu minota 10 ya nyuma, APR yongeye gusubira mu mukino ni nyuma y’uko umutoza Bagirishya Anaclet akoze impinduka zitandukanye mu bakinnyi yifashishaga.

Umukino warangiye APR yegukanye igikombe ku bitego 24-22.

Umwanya wa gatatu mu bagabo wegukanywe na Gicumbi HT nyuma yo gutsinda Prisons yo muri Uganda ibitego 36-34.

Abakinnyi bitwaye neza mu irushanwa:

Abagore: Adokorach Brenda (Prisons), Uwineza Frolence (Three Stars), Uwase Jane (Three Stars), Aber Priscillah (Prisons), Uwanyirigira Betty (Three Stars), Noella (Three Stars) na Lamunu Scovia (Prisons).

Abagabo: Ayo Patrick (Prisons), Muhumure Elisée (APR), Anthony (APR), Aboku Dablniel (Prisons), Akayezu André Kibonge (Police), Musoni Albert (APR) na Kayijamahe Yves (Police).

Pressbox Author

Pressbox Author

Leave a Replay

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.