Tariki ya 27 Ugushyingo abakinnyi n’abayobozi mu ikipe ya Polisi ikina umukino w’amaboko (Police Handball Club) basuzumwe icyorezo cya COVID-19. Iki ni igikorwa cyabere ku cyicaro gikuru cya Polisi y’u Rwanda ku Kacyiru.
Ibi bikozwe mu rwego rwo kwitegura isubukurwa rya shampiyona mu mukino wa Handball mu Rwanda nyuma y’aho muri Werurwe uyu mwaka imikino yari yabaye ihagaritswe kubera icyorezo cya COVID-19 cyari cyageze mu Rwanda. Shampiyona mu mukino wa handball yari yasubitswe hamaze gukinwa imikino ibiri gusa ya Shampiyona.
Ikipe ya Police HC ifite agahigo ko kuba imaze kwegukana igikombe cya shampiyona inshuro zirindwi, muri iyi shampiyona ya 2020 Police HC iri mu itsinda ry’Amajyepfo aho iri kumwe n’amakipe ya UR-Huye HC, ES Kigoma, Nyakabanda n’ikipe ya Miyove.
Shampiyona yasubitswe ikipe ya Police HC imaze gutsinda imikino yayo ibiri ibanza aho yari imaze gutsinda ikipe ya Nyakabanda ibitego 33 kuri 19 n’ibitego 42 kuri 25 by’ikipe ya ES Kigoma.
Umutoza w’ikipe ya Police HC, Inspector of Police (IP) Antoine Ntabanganyimana avuga ko muri Kanama aribwo hemejwe ko m’Ukuboza aribwo shampiyona igomba gusubukurwa.
Yagize ati “Inteko rusange y’ishyirahamwe ry’umukino wa Handball mu Rwanda ubwo iheruka guterana muri Kanama yateganyije ko shampiyona izasubukurwa mu kwezi k’Ukuboza. Kwisuzumisha COVID-19 ni itegeko kandi bijyanye n’amabwiriza ya Leta kandi biri no mu rwego rwo kugira ngo twitegure.”
IP Ntabanganyimana yakomeje avuga ko igihe bagitegereje itangazo ribamenye amatariki yo gusubukura shampiyona, abakinnyi bazaba bakora imyitozo baba ahantu hamwe.
Police Handball Club yatangiye gutwara igikombe cya shampiyona guhera mu 2011, 2012, 2014, 2015, 2018 ndetse no mu mwaka wa 2019.
Iyi kipe kandi niyo ifite igikombe gihuza amakipe yo mu Karere ka Afurika y’Iburasirazuba no hagati ndetse n’igikombe cy’intwari z’u Rwanda cyabaye muri Gashyantare uyu mwaka.
Source: RNP
