Yanditswe na Adam Yannick
Ikipe ya Rayon sports iherutse kwitwa n’umuvugizi wayo ko ‘iri hasi’, ifite abakinnyi ‘baciriiritse’, yitwaye neza itsinda Gorilla FC 2-1 mu mukino wa shampiyona wakinywe kuri uyu wa 19 Ukuboza 2025.
Ni umukino w’umunsi wa 12 wa Rwanda Premier League 2025-2026, ahari hateganyijwe imikino ibiri: Hari umukino wagombaga guhuza As Kigali FC na Bugesera FC ndetse na Gorilla FC na Rayon Sports FC.
Ni imikino yose yabereye mu mujyi wa Kigali kuri Kigali Pelé Stadium.
Umukino wari witezwe n’abakunzi ba Sports ndetse n’abakunzi ba Rayon Sports FC n’umukino wagimbaga guhuza Gorilla FC na Rayon Sports FC.
Bitewe n’uko mu mikino y’umunsi wa 11 Rayon yari yatsinzwe na Bugesera FC ndetse yazanye n’umutoza mushya Romami Marcel mu gihe Gorilla Fc yari yanganyije na APR FC.
Uyu mukino waje kurangira Rayon Sports FC yitwaye neza imbere ya Gorilla FC.Umukino watangiye ku isaha ya saa Kumi n’ebyiri n’igice z’umugoroba (18H30 ).
Ni umukino watangiranye imbaraga nke ku mpande zombi wabonaga amakipe yatinyanye cyane ndetse nta n’imwe wavuga ko irimo kwataka cyane ku buryo wavuga ko umunota ku munota iraza kubona igitego.Ku munota wa 21, Rayon Sports FC yabonye igitego cya mbere.
Ni igitego cyatsinzwe na Emery Bayisenge kuri kufura nyuma y’ikosa Akayezu Jean Bosco yari akoreye Sindi Paul Jesus. Uyu musore yeteye kufura nziza yijyana mu izamu.Gorilla FC yahise itangira gushaka igitego cyo kwishyura ariko ikomeza kugenda ihusha ibitego wavuga ko byazwe.
Ku munota wa 35, Gorilla FC yaje kubona igitego cyo kwishyura gitsinzwe na Uwimana Frank wacenze Ganijuru Elie bikarangira ateye mu izamu.Igice cya mbere cyarangiye ikipe zombi zinganyije igitego kimwe kuri kimwe (1-1).
Ni igice cyagaragayemo kugera imbere y’izamu ku mpande zombi ndetse ubona uburyo bwo guhanahana nta n’imwe irusha indi.Mu gice cya Kabiri Igice cya kabiri cyatangiye ,ubona buri kipe ishaka uko yabona igitego cy’intsinzi.
Ku munota wa 68, Rayon Sports FC yatsinze igitego cya Kabiri gitsinzwe na Ndayishimiye Richard kuri Kufura. Ni ikosa ryaturutse ku mupira watewe na Sindi Paul Jesus ukorwa na myugariro wa Gorilla FC ihita ivamo igitego cya Kabiri.
Gorilla FC yakomeje kugenda ishakisha igitego cyo kwishyura kugira ngo nibura irebe ko yabona igitego cyo kwishyura ariko bikomeza kugenda byanga.Umukino waje kurangira Rayon Sports FC itsinze umukino ku bitego 2-1.
Ni umukino utari woroshye bitewe nibyavuzwe mbere ndetse abakunzi benshi ba Rayon Sports FC mwaganiraga wumvaga batewe ubwoba na Gorilla FC bijyanye n’umukino yakinnye na APR FC.
Undi mukino wabanje wahuje As Kigali FC na Bugesera FC warangiye amakipe yombi anganyije 0-0.
Indi mikino izakomeza tariki 20 na 21/12/2025
