Football: RPL Ibyo wamenya ku makipe y’amakeba y’ibihe byose muri shampiyona y’u Rwanda agiye guhura Ku munsi wa Munani

Advertise your products Here Better Faster

Football: RPL Ibyo wamenya ku makipe y’amakeba y’ibihe byose muri shampiyona y’u Rwanda agiye guhura Ku munsi wa Munani

Yanditswe na Adam Yannick

Tariki 2 ugushyingo 2024 nibwo hateganyijwe umukino w’amateka muri shampiyona y’icyiciro cya mbere mu mupira w’amaguru mu Rwanda hagati ya Rayon Sports FC na Kiyovu Sports Club.

Iyo shampiyona igiye gutangira abakunzi ba Ruhago mu Rwanda ikintu cya mbere bareba n’igihe umukino uzahuza Kiyovu Sports Club na Rayon Sports FC uzabera ndetse na APR FC na Rayon Sports FC .

Ihangana ryabo ryaturutse he?

Guhangana kw’aya makipe ntabwo ari iby’ungubu gusa ahubwo hari n’abakubwira ko byagabanyutse ugereranyije na cyera.

Kuva mu 1965 ikipe ya Kiyovu Sports Club na Rayon Sports FC yari afitanye ubukeba bwo ku rwego rwo hejuru, aho umukino wayahuzaga yombi, ari wo warebwaga n’abafana benshi mu Rwanda.

Umunyamakuru w’imikino mu Rwanda, Gakuba Abdoul Djabar uzwi nka Romario yavuze ko Kiyovu Sports Club na Rayon Sports FC zatangiye guhangana kera ndetse byaryoshyaga umupira w’u Rwanda.

Yagize ati “Amateka atwereka ko guhangana hagati ya Rayon Sports FC na Kiyovu Sports Club kwatangiye mu 1968 ubwo aya makipe yombi yahuriraga i Kabgayi, uwo mukino ukaza gusubirwamo bitewe n’uko amakipe yombi yashinjanyaga gukinisha abakinnyi batujuje ibyangombwa, ariko byose byaje kurangira Kiyovu Sports itsinze Rayon Sports FC ibitego 4-2.”

Guhangana kw’aya makipe yombi kwaje kwiyongera hagati yo mu 1981-1982 ubwo Kiyovu Sports Club yasinyishaga abakinnyi babiri bari bavuye mu Burundi ari bo Muvala Valens na Tindo Bulongo. Kiyovu Sports Club (Urucaca) yumvaga ko igiye kumvisha amakipe arimo na Rayon Sports FC ndetse igiye kuba mpatsemakipe, nyuma yo kugura aba abakinnyi ariko umukino wa mbere bakinnye na Rayon Sports FC (Murera) kuri Stade de l’Amitié (Stade Mumena), yatsinze Kiyovu Sports Club ibitego 2-1.

Uwo mukino wababaje Muvala na Tindo dore ko bari bavuye i Burundi ari abakinnyi bakomeye kandi baje bahenze, bituma barahira ko Rayon Sports FC itazongera kubatsinda na rimwe bakiri muri Kiyovu Sports Club.

Kuva icyo gihe gutsinda Kiyovu Sports Club kwa Rayon Sports FC kwabaga ari ukunganya, kugeza ubwo Muvala Valens yayivagamo mu 1987 akajya gukina ku mugabane w’u Burayi mu ikipe ya FC Coutrin yo mu Bubiligi.

Ibi byarakomeje gusa Kiyovu Sports Club isa gusigwa na Rayon Sports FC nyuma ya Genocide yakorewe Abatutsi muri Mata 1994 bijyanye nuko iyi kipe yo ku Mumena amikoro yagendaga agabanyuka.

Ni nabyo byaje kuba ubwo tariki ya 15 Kamena muri 2017, kuri stade yo ku Mumena Rayon Sports FC yatsindaga Urucaca ibitego 2-1 bigatuma irangiza ku mwanya wa 15 muri shampiyona y’icyiciro cya mbere byashoboraga gutuma Urucaca rumanuka mu cyiciro cya kabiri nubwo byaje kurangira Urucaca rutamanutse mu cyiciro cya kabiri bituma kongera guhangana hagati ya Kiyovu Sports Club na Rayon Sports FC

Kuva muri 2020 Kiyovu Sports Club yongeye kugaruka mu gahangana na Rayon Sports FC ubwo Mvukiyehe Juvenal yari atorewe kuyobora Urucaca bihebeye kubera ko kimwe mu ntego yarafite harimo no kongera guca ako gasuguro ka Rayon Sports FC kandi yabigezeho kuko mu myaka 3 yayoboye ntabwo iyi kipe yambara Ubururu n’Umweru yabashize kumutsinda.

Guhangana kw’aya makipe yombi ntabwo biri mu kibuga gusa ahubwo biri no hanze yacyo, mu Rwanda Kiyovu Sports Club yigeze gutanga itangazo ryo kubika Rayon Sports FC kuri Radio Rwanda ko umugore wayo yitabye Imana. Iryo tangazo ryasomwe na Nyakwigendera Kalinda Viateur wari umunyamakuru w’imikino muri icyo gihe.

Iryo tangazo ryavuga riti:”Kiyovu Sports Club ibabajwe n’urupfu rw’umugore wayo Rayon Sports FC , imihango yo gushyingura iteganyijwe kubera kuri Stade Regional (Kigali Père Stade) ku munsi no ku isaha bari bafitanyeho umukino. Kiyovu Sports Club yamenyeshaga inshuti n’abavandimwe ari bo Mukura VS, Etincelles FC, Panthere Noire FC na Mukungwa. Ntabwo ari iryo tangazo gusa kuko Kiyovu Sports Club yigeze no gutanga irindi itumira mu bukwe ayo makipe yari yise inshuti n’abavandimwe, ivuga ko ifite ubukwe na Rayon Sports FC yitaga umugore wayo.

Rayon Sports FC nyuma yaho muri 2017 nayo yaje gushyingura Kiyovu Sports Club ubwo yayitsindaga ku mukino wa nyuma wa shampiyona aho Kiyovu Sports Club yarangije iri ku mwanya wa 15.

Icyo imibare ivuga mu kibuga mbere y’umukino

Kuva muri 2010 kugeza muri 2024 muri shampiyona Rayon Sports FC igiye guhura na Kiyovu Sports Club ku nshuro ya 30. Muri iyi mikino Rayon Sports FC yatsinzemo 11, Kiyovu Sports itsinda imikino 10, zinganya 8.

Mu mikino 8 ya shampiyona iheruka guhuza aya makipe yombi ya Rayon Sports FC ntabwo izi gutsinda uko bisa, Kiyovu Sports Club yatsinzemo imikino 5 naho banganya itatu.

Rayon Sports FC iheruka gutsinda Kiyovu Sports Club muri shampiyona taliki ya 1 Ukuboza 2019 ubwo yayitsindaga igitego 1-0. Mu mukino uheruka kubahuza muri shampiyona 2023-2024 tariki 11 Gicurasi 2023, warangiye Kiyovu Sports Club itsinze igitego 1-0 cya Alfred Leku.